Garazi Arrulak bere lehen liburua duela hiru hilabete Donostian aurkeztu zueneko bideoa duzue hau. Handik gutxira, Durangoko Azokan aurkeztu zuen. Apirilaren 25ean berriro izango da Donostian, Egiako Kultur Etxean
Garazi Arrula Ruiz (Tafalla, 1987), Rakel Alvarez, hau ere tafallarra, lagun hartuta, ETBko Mihiluze programan lehiatu zen 2011ko maiatzean. Itzulpengintza eta interpretazioa lizentzia ikasi eta orain tesia egiten ari da autoitzulpenaren arloan. Haurrentzako eta helduentzako zenbait literatura lan ekarri ditu euskarara; besteak beste, Walter Benjamin, Anaïs Nin eta Amélie Nothomben obra bana. Txalapartak argitaratutako Gu orduko hauek du lehen liburua.
Zortzi ipuinez osatua da Garazi Arrularen lehen liburua, eta azken ipuinak ematen dio izenburua obrari: Gu orduko hauek. Gu pluraleko lehen pertsona da. Norbera parte den kolektiboa adierazten du, beraz. Atxikimendu sentimendu bat, eta, aldi berean, multzo horretan ez daudenekiko diferentzia. Ordukok distantzia dakar gogora, iragan den garaia; denborazko distantzia, nahitaez fisikoa, lekuzkoa ere badena. Hauek, berriz, erakusle hurbilena da; ingurukoak adierazten ditu, nahiz eta norbera ez den zaku horretako parte. Hirurak elkarrekin jarriz gero, multzo bakarrean, bereizketa horiek guztiak ikusgarri egiten dira. Hala, bada, distantzia dago ipuinotan: ezberdinaren aurrean sentitzen den bestetasuna; errealitatea eta fantasia banatzen duen bitartea; desiraren zirrikituetatik sartzen den urruntasuna; senidetasunak gainditzea lortzen dez duen hesia; gizakion artean dagoen inkomunikazio hitsa.
No hay comentarios:
Publicar un comentario